Zinemaldia Startup Challenge-ren seigarren deialdia ireki da, Estatuko eta Europako ekintzaileei zuzenduta

Donostiako Zinemaldiak Zinemaldia Startup Challenge lehiaketaren seigarren deialdia ireki du. Estatuko eta Europako ekintzaileei eta startupei zuzendutako lehiaketa da, eta ikus-entzunezkoen arloan teknologia berriak txertatzen dituzten proiektuak biltzen ditu. Izena emateko epea maiatzaren 31n amaituko da eta aurreko edizioetan bezala Vicomtech epaimahaiko kide izango da.

Ekimena Zinemaldia & Technology ekitaldiaren esparruan kokatzen da. Zinemaldiaren apustu estrategikoa da Zinemaldia & Technology, eta teknologiari eta ikus-entzunezkoen industriari buruz hausnartzeko eta bi sektoreen arteko harremanak estutzeko gune gisa kokatzeko jomuga du. Lehiaketa hau ‘Spanish Screenings: Financing & Tech’-en jardueretako bat da, ‘Spanish Screenings XXL’ ekitaldiaren ardatzetako bat. Ekimena Espainiako industria zinematografikoari eskainita dago, eta bertan film eta ikus-entzunezko proiektu ugari aurkezten dira, Espainiako ikus-entzunezko ekoizpena nazioarteko merkatu batean laguntzeko helburuarekin.

Bi lehiaketetan izena ematen duten proiektuek hainbat baldintza bete behar dituzte. Lehenik eta behin, ekintzaile batengandik edo sortu berri den startup batengandik abiatu behar dira –2018ko abenduaren 31z geroztik eratua– eta edozein garapen-fasetan egon behar dute. Bigarrenik, teknologia berriak ikus-entzunezkoen esparruan aplikatzean oinarritu behar dira. Azkenik, pertsonek edo startupek egoitza fiskala Espainian edo Europako herrialde batean izan behar dute, eta enpresa-proiektua Euskal Autonomia Erkidegoan abian jartzeko aukera jaso behar dute.

BIC – Euskadiko Enpresa eta Berrikuntza Zentroetako, TECNALIAko eta Vicomtech-eko profesionalez osatutako aditu-batzorde batek hamar proiektu finalista aukeratuko ditu, bost espainiar eta bost europar. Proiektu horiek Euskadiko Parke Teknologikoen Sareko BICetako (Business Innovation Center) batean urtebetez inkubazio-gune batera doan sartzeko aukera izango dute. Bestalde, hautatutako 10 proiektuek 500.000 eurorainoko finantzaketa eskuratzeko aukera izango dute, Euskal Autonomia Erkidegoan garatzeko. Amaieran, bi epaimahai independentek 10.000 euroko bi sari emango dituzte Europako eta Estatuko proiektu onenarentzat. Gainera, hirugarren epaimahai batek 3.000 euroko aipamen berezia egingo du, eta hautatutako hamar proiektuetako baten ekintzailetza-balioak aitortuko ditu.

Eusko Jaurlaritzak, Ekonomiaren Garapen, Jasangarritasun eta Ingurumen Sailaren eta SPRIren bitartez sustatzen du Zinemaldia Startup Challenge. Donostia Zinemaldiak antolatutako Zinemaldia & Technology jardunaldiaren ekimen nagusia da, TECNALIA, ALÍA (Ikus-entzunezkoen Industriaren Aliantza) eta Vicomtech-en laguntzarekin.