Vicomtech zentroak AutoMOTIF proiektuan parte hartu du, Europako garraio multimodalaren automatizazioan aitzindaria
Europako ekimenaren helburu nagusia Europan garraio multimodaleko sistemak integratzeko eta automatizatzeko estrategiak, negozio-ereduak eta gomendio arautzaileak garatzea da
16.07.2024
Ekainaren 25ean eta 26an AutoMOTIF proiektua jarri zen abian Atenasen. Komunikazio eta Sistema Informatikoen Institutuak (ICCS) koordinatzen duen ekimena, Horizon Europe programaren esparruan dago. AutoMOTIFen helburua logistikaren eta garraioaren sektoreak iraultzea da, hornidura-katea eta karga multimodalaren fluxua automatizatzeko estrategia berritzaileak erabiliz.
3.9 milioi euroko aurrekontuarekin eta 36 hilabeteko iraupenarekin, proiektuak Europako hainbat herrialde eta sektoretako 17 bazkide biltzen ditu.
Vicomtech zentroak Bilbao PortLab eta Consignaciones Toro y Betolazarekin batera lan egiten du Bilboko Portuko Eragiketen Automatizazioa simulatzeko tresna bat sortzeko.
Testuinguru horretan, Vicomtech buru da Bilboko Portuko Eragiketen Automatizazioaren erabileraren kasuan, Bilbao PortLab eta Consignaciones Toro y Betolazarekin batera. Zehazki, zentroak plataforma bat ezartzen du, alde batetik, egungo eragiketen erreplika digitala egiteko eta, bestetik, etorkizuneko agertoki automatizatu baten simulazioa egiteko.
Zenbait adierazle monitorizatuz, automatizazioak enpresa kontsignatarioak eskaintzen dituen itsas-portu zerbitzuetan eta zerbitzu logistikoetan eman ditzakeen hobekuntzak ebaluatu ahal izango dira.
Vicomtech-ek AutoMOTIFen jorratutako erronka teknologiko nagusiak Biki Digital geoerreferentziatuen ekosistemak irudikatzean zentratzen dira. Ekosistema horiek ingurune errealen datuak eta ereduak erabiltzen dituzte prozesu baten jarduna aurreikusteko, eta funtsezko elementuak dira eskuzko eremutik automatizaturako trantsizioan.
AutoMOTIFekin, Vicomtech zentroak, gainerako bazkideekin batera, logistikaren eta garraioaren sektoreko berrikuntzaren aldeko apustuarekin bat egiten du, Adimen Artifizialeko Teknologietan dituen ezagutzak eta esperientzia emanez, eta Europako garraio-sistema multimodalen elkarreragingarritasuna eta eraginkortasun operatiboa nabarmen hobetzen duten estrategia berritzaileekin prozesuak irauliz.
