Adimen artifizialaren eragin klinikoa neurtzea biotech sektorean: ikuspegi integrala Vicomtech-etik

Osasun- eta bioteknologia-sektoreko digitalizazioa azkar ari da aurrera egiten, eta adimen artifizialak (AA) funtsezko papera betetzen du produktu berriak garatzeko, prozesuak optimizatzeko eta eraginkortasuna hobetzeko osasunaren arloan. Sektore honetan soluzio berritzaileak sortzen dituzten enpresentzat, ez da nahikoa teknologien errendimendu teknikoa neurtzea. Funtsezkoa da benetako eragina ebaluatzea praktika klinikoan, pazienteen osasunean, eta ziurtatzea beren produktuek eta zerbitzuek balio ukigarri bat sortzen dutela, arreta-kalitatea eta osasun-emaitzak hobetzeko.

Baliozkotze teknikotik baliozkotze klinikora

Osasun-sektorerako algoritmo bat garatzea ez da amaitzen ingurune kontrolatuetan entrenatze eta probatze fasean. Bere baliozkotzeak hainbat etapa hartu behar ditu kontuan, garapen teknologikoen zikloekin bat etorriz, baldintza errealetan eraginkortasuna bermatzeko. Lehenik eta behin, baliozkotze historikoa egiten da datu historikoekin edo aurretiazko behaketa-ikerketa bat egiten da datu berriak biltzeko; ondoren, ingurune simulatuetan probak egiten dira eta, azkenik, ingurune kliniko errealetan osasun-profesionalen gainbegiradapean. Fase hauetan guztietan, errendimendu teknikoa ez ezik, algoritmoaren interpretagarritasuna, lan-fluxu klinikoetan integratzeko gaitasuna eta erabaki medikoetan duen eragina ere funtsezkoak dira.

Algoritmoen eragin klinikoa neurtzea: zehaztasunetik harago

AAk osasunean balioa ekar dezan, hobekuntza zehatzetan islatu behar da: diagnostiko azkarragoak eta zehatzagoak, arreta denbora eraginkorragoak eta, azken finean, osasun-emaitza hobeak. Hori lortzeko, hasieratik ikuspegi diziplinartekoa behar da, teknologia klinikoen eta bioteknologia-adituen esperientziarekin uztartuz.

Vicomtech-en, osasunari eta bioteknologiari aplikatutako adimen artifizial multimodalean espezializatutako ingeniari eta biologo taldea dugu, datu-iturri anitz integratzen dituena, hala nola irudi medikoa, omikak, datu klinikoak eta biomarkatzaileak, AA eredu eta soluzio digital aurreratuak garatzeko. Erregulazio sanitarioan adituak diren eragileekin eta osasun-profesionalekin elkarlanean aritzen gara, gure teknologiak berritzaileak ez ezik, benetako testuinguruetan aplikagarriak eta baliozkotuak izan daitezen.

Aliantza estrategikoak eta araudia betetzea

Algoritmoen eragin klinikoa haien inplementazio egokiaren eta osasun-sektorean onarpenaren araberakoa ere bada. Horregatik, Vicomtech-en aliantza estrategikoak ezartzen ditugu ospitaleekin eta osasun-produktu eta -zerbitzuen enpresekin, gure teknologiak benetako eszenatokietan baliozkotu eta osasun-sistemaren beharretara egokitu ahal izateko.

Era berean, arau-estandarrak betetzea gure ikuspegiaren oinarri da. ISO 13485 ziurtagiria dugu, eta horri esker, osasun-teknologiak kalitate estandar altuenen arabera gara ditzakegu, haien segurtasuna eta eraginkortasuna bermatuz. Araudiarekiko konpromiso honek ez du soilik osasun-profesionalen eta pazienteen konfiantza sendotzen gure soluzioetan, baizik eta klinika-inguruneetan inplementazioa eta lan-fluxu medikoetan integratzea ere errazten du.

Ondorioa

AAren benetako balioa bioteknologian eta osasunean ez dago soilik errendimendu teknikoan, baizik eta arreta eta emaitza klinikoak hobetzeko duen gaitasunean. Hori lortzeko, ikuspegi integrala behar da, diseinutik eta baliozkotzetik hasi eta ospitale eta kliniketako benetako aplikaziora arte, betiere diziplina anitzeko taldeen parte-hartzearekin eta araudia betez.

Vicomtech-en, bioteknologia-enpresekin egiten dugu lan, AA oinarritutako teknologiak garatzeko, medikuntza pertsonalizatuan eta diagnostiko aurreratuan aplika daitezkeenak. Gure adimen artifizial multimodalaren esperientziari eta ISO 13485 ziurtagiriari esker, ziurtatzen dugu soluzio hauek ez direla soilik berritzaileak, baizik eta araudi-estandarrak betetzen dituztela klinika-inguruneetan gero aplika daitezen. Ikuspegi horri esker, bioteknologia-enpresek beren garapenen merkaturatzea azkartu dezakete, arriskuak minimizatuz eta baliozkotze klinikoaren prozesuaren eraginkortasuna optimizatuz.